Цените на нафтата пораснаа на меѓународните пазари со послаб долар, бидејќи стравувањата на инвеститорите од недоволна понуда донекаде се избалансираа со нивните очекувања дека зголемувањето на каматните стапки во САД ќе влијае на економскиот раст и, следствено, ќе ја поттикне побарувачката.
Цената на барелот на лондонскиот пазар во понеделникот порасна за 79 центи во однос на претходното затворање, на 103,99 долари. На американскиот пазар со барел се тргуваше по 82 центи поскап, по 95,52 долари.
„Малку послабиот американски долар и растот на светските берзи ги поддржаа цените на нафтата“, рече Џовани Стауново од UBS.
Фјучерсите на нафтата беа нестабилни во последниве недели, бидејќи трговците балансираат помеѓу очекувањата за понатамошно зголемување на каматните стапки, што би можело да ја ослабне економската активност и на тој начин да го намали растот на глобалната побарувачка за горивото, како и стравувањата дека снабдувањето со нафта е недоволно поради прекините во руската трговија со нафта по западните санкции врз Русија поради војната во Украина.
„Зголемените стравувања од глобална рецесија укажуваат на тоа дека растот на цената на нафтата најверојатно ќе биде ограничен во блиска иднина, без оглед на геополитичките случувања“, рече Џефри Хали од OANDA.