Pornhub направи значителни промени кои се однесуваат на политиката за содржини откако во колумна на New York Times беа документирани илјадници порнографски содржини меѓу кои и за силување и сексуално малтретирање малолетници, кои лесно циркулираа на овој сајт за возрасни.
Од Pornhub најавија низа промени кои значително ќе влијаат на спречувањето несогласно поставување видео содржини на нивните сервиси и ветија подобра контрола на содржините.
Корисниците на овие услуги повеќе нема да можат да стават видеоснимки доколку нивните канали не се верификувани, односно потврдени од Pornhub. Исто така, корисниците повеќе нема да имаат можност да симнуваат видеа од овој сајт за возрасни, ќе се имплементира нова политика и во наредната година ќе биде објавен извештај за транспарентност.
Во колумната на Николас Кристоф се напомнува дека Pornhub има само 80 модератори, луѓе кои ја контролираат содржината, додека Facebook има над 15.000 модератори само во САД. Pornhub истакнува дека направиле нов Red Team, задолжен за отстранување илегална содржина на овој сајт. Истакнуваат дека работат со 40 непрофитни организации за да ги отстранат навредливите снимки.
По реакцијата на сајтот, се огласи и Кристоф на Twitter.
„Многу зависи од тоа колку одговорно Pornhub ги имплементира овие правила, воопшто не ја придобија мојата доверба, но овие правила се од големо значење. Многу работи ќе се разликуваат од тоа дали веќе објавените содржини на нивната страница ќе бидат забранети или отстранети“, смета тој.