Поранешниот украински претседател Петро Порошенко доцна синоќа бил вратен од граница, во обид да ја напушти земјата и да влезе во Полска.
Украинските медиуми пренесуваат дека Порошенко се обидел да ја напушти земјата, а на неговата страница „Европска солидарност“ тврдат дека властите го ставиле на „црна листа“ и дека му е забрането да ја напушти земјата.
Потпретседателката на украинскиот парламент Ирина Герашченко, воедно и пратеничка од партијата на Порошенко, соопшти дека поранешниот украински претседател имал намера да присуствува на годишната седница на парламентарниот собир на НАТО, кој се одржува на 29 и на 30 мај во Литванија.
Таа наведе дека на 31 мај и 1 јуни Порошенко требало да учествува на состанокот на Европската народна партија, но сега се е доведено во прашање откако доцна синоќа беше запрен на контролен пункт каде му беше врачена наредба со која му е забрането да патува надвор од земјата.
Според пишувањето на Украинска Правда, зад сето ова може да стои истрага поради можно велепредавство во кое е опфатен Порошенко, поради што уште во јануари, по враќањето од краток егзил во Турција, му беше одредена мерка забрана за напуштање на Киевската област.
