Цената на благородниот метал паладиум скокна на глобалните берзи.
Само во изминативе две недели растот изнесува над 25% и цената е двојно поголема во споредба со истиот период лани.
Со цена од околу 2.500 долари за унца, паладиумот е поскап и од златото, а се чини дека нема да почне да се намалува наскоро.
Но, што е паладиумот и за што се користи и зошто неговата цена расте толку нагло?
Паладиумот е сјаен бел метал и се вбројува во иста група со платината. Најголемиот дел од паладиумот како суровина доаѓа од Русија и Јужна Африка и се добива како нуспроизвод при обработката на руда за добивање други метали како платина и никел.
Клучната комерцијална употреба на паладиумот е како компонента во каталитички конвертори, кои се дел од издувниот систем на автомобилите задолжен за контрола на издувните гасови.
Најчесто се користи кај хибридни и возила со бензински мотор, што ја објаснува засилената побарувачка за овој метал.
Најголемиот дел од палатиумот, повеќе од 80%, се користи за овие уреди кои ги претвораат токсичните гасови како јаглерод моноксид, во помалку штетни гасови и водена пареа.
Во помали размери се користи во електроника, во стоматолошки материјали и во изработка на накит.
