Култура

Поставена бистата на Мартиноски во Букурешт

11. декември 2019 - 12:45 | Ф.З.

Во Букурешт денеска беше откриена бистата на еден од најпознатите македонски сликари, крушевчанецот Никола Мартиноски.

Едмонд Адеми, кој е министер без ресор задолжен за дијаспора, ја имаше честа да ја открие бистата поставена во познатиот парк „Михаи I“.

„Денес во Букурешт, ја имам честа да ја откријам бистата на познатиот македонски сликар, Никола Мартиноски. Нема сомнеж дека овој убав и вреден проект, дополнително ги зацврстува односите и врските меѓу двете култури, македонската и романската“, напиша Адеми на facebook.

„Минатата година, 8-ми декември, Денот на Свети Климент Охридски, Романскиот паламент го прогласи за Ден на македонскиот јазик во Романија. Само година дена подоцна, успеавме да го реализираме она што го ветивме: поставување на бистата на Никола Мартиноски, тука во Букурешт“, вели Адеми во видео порака објавена на неговиот facebook профил.

Роден на 18 август 1903 година во Крушево како Никола Мартин, Мартиноски уште како дете одел на часови во Скопје кај познатиот мијачки сликар Димитар Андонов Папрадишки, а потоа се запишал на Академијата во Букурешт каде дипломирал во 1927 година. Најпозната слика му е „мајка со дете“ која иамо ја почнал во 30-тите, ја завршил дури по 30 години. Починал на 7 февруари 1973.

Паркот „Михаи I“ изобилува со бисти на луѓе кои со своите дела во уметноста, политиката, музиката, филозофијата и книжевноста оставиле длабок траг во светското културно наследство. Таму се Бела Барток, Лудвиг ван Бетовен, Антон Чехов, Фредерик Шопен, Чарлс Дарвин, Наим Фрашери, Христо Ботев, Шарл де Гол, Јохан Гете, Николае Балческу, Виктор Иго, Васил Левски, Вилијам Шекспир, Рабиндранат Тагоре, Пјотр Илич Чајковски, Михаи Еминеску, Лев Толстој, Марк Твен, Леонардо да Винчи и од денеска нашиот Никола Мартиноски.

Коментирај