Соиграч на Горан Пандев направи дар-мар во противничката одбрана и постигна гол, а сето тоа држејќи шише вода во левата рака.
Напаѓачот на Џеноа, Матија Дестро, на бизарен начин постигна гол викендов во италијанската Серија А.
Во 85. минута од натпреварот, при резултат од 2:2 на домашен терен против Верона, нашиот Пандев додаде до Дестро кој на теренот беше останат со шишето вода со кое претходно се освежуваше. Трчајќи со шишето во левата рака, прво го издрибла гостинскиот дефанзивец Корај Гинтер, а потоа лесно ја префрли топката преку голманот Лоренцо Монтипо.
Дестро даде објаснување за необичниот настан, односно како му се најде шишето и со него да трча по теренот.
„При крајот на натпреварот бев многу уморен, имав грчеви. Пиев вода и не знаев каде да го фрлам шишето, па одлучив да го задржам“, рече на новинарско прашање.
Натпреварот заврши 3:3 откако после голот на Дестро за 3:2 Верона во судиското надополнување успеа да израмни.