Германската влада постигна договор со Европската комисија во спорот околу забраната за производство на нови автомобили со мотори со внатрешно согорување, соопштија денеска претставници од двете страни.
Спорот меѓу Берлин и Брисел околу договореното постепено укинување на ваквите автомобили се фокусираше на тоа дали производителите и понатаму ќе можат да произведуваат возила што ќе користат т.н. е-горива по 2035 година.
„Договор за идната употреба на е-горива во автомобилите“
„Постигнавме договор со Германија во врска со идната употреба на е-гориво во автомобилите“, напиша на Twitter потпретседателот на Европската комисија, Франс Тимерманс.
„Сега ќе работиме заедно за да ги усвоиме стандардите за јаглерод диоксид за регулација на автомобилите што е можно побрзо, а Комисијата потоа брзо ќе ги преземе потребните правни чекори“, додаде тој.
Германскиот министер за транспорт Фолкер Висинг, кој се заложи за промена, напиша дека „возилата со мотори со внатрешно согорување сè уште може да се пререгистрираат по 2035 година доколку се полнат исклучиво со горива неутрални за CO2“.
„Европа останува технолошки неутрална“, додаде тој.
Допрва треба да се разјаснат правните прашања
Синоќа имаше напредок во преговорите, рече Висинг. Договорот следи по голем број разговори во текот на изминатата недела, вклучително и оние на самитот на ЕУ в четврток и в петок. Говорејќи вчера попладне, Висинг рече дека допрва треба да се разјаснат конечните правни прашања.
Октомврискиот договор со ЕУ за дозволување автомобили со нулта емисија на штетни гасови само по 2035 година беше ставен во мирување откако Германија во последен момент покрена приговори и изврши притисок за дополнителни барања.
