Лестер Сити потрошија 22 милиони фунти за да го донесат во своите редови капитенот на Спортинг Лисабон, Адриен Силва, но трансферот сѐ уште не е официјализиран и е под закана да биде откажан.
ФИФА одбива да ја прифати регистрацијата на трансферот на Адриен Силва во Лестер Сити, откако „лисиците“ за само 14 секунди го пропуштија рокот за регистрирање на играчи.
Адриен Силва беше донесен како замена за Дени Дринквотер, кој на последниот ден од трансфер периодот замина во Челзи, но ФИФА, како и португалските медиуми, тврдат дека Лестер Сити задоцниле со предавање на потребната документација и Силва нема да може да биде регистриран за настап до крај на оваа календарска година.
Од Лестер пак тврдат дека сѐ уште се во преговори со ФИФА за да му се издаде работна дозвола на играчот и така тие користејќи исклучок во правилата ќе можат да го регистрираат. Доколку ова не се случи, играчот ќе мора да чека за настап до јануари, кога ќе биде отворен следниот рок за регистрирање на играчи.
