Светската боксерска асоцијација (WBA) соопшти дека е постигнат договор околу борбата меѓу Британецот Тајсон Фјури и Украинецот Олександр Усик, за апсолутен светски шампион во бокс во тешка категорија.
Иако Фјури во петокот изјави дека Усик, шампионот на WBA, IBF и WBO, треба да добие само 30 отсто од заработката од борбата, со што го загрози нејзиното одржување, украинскиот ас на социјалните мрежи објави дека се согласил на понудата, но само доколку Фјури на Украина ѝ донира милион фунти.
WBA потоа објави дека е постигнат договор и дека борбата ќе се одржи на 29 април на Вембли.
„Претседателот на WBA доби информација од тимовите на Олександр Усик и Тајсон Фјури дека е постигнат договор за борба за обединување на титулата. Тие бараат време да работат на договорите за да се заокружи зделката“, се вели во соопштението на WBA.
Така, Усик се согласи на нееднакви услови само за да се одржи борбата, иако сè уште не е потврдено дека Фјури ќе донира 1 милион фунти за Украина.
