HBO официјално потврди дека мега-популарната ТВ-серија „True Detective” ќе добие трета сезона во која оскаровец ќе ја толкува главната улога.
Во описот на новото продолжение од крими-серијата стои: „Третата сезона на ‘True Detective’ ќе обработува мрачно злосторство кое содржи мистерија што се протега низ неколку децении во околината на Озаркс“.
Махершала Али ќе биде во улогата на Вејн Хејс, полициски детектив од северозападен Арканзас.
За сценариото ќе биде задолжен Ник Пицолато, како што беше случајот и во претходните две сезони. Пицолато исто така ќе биде дел и од режисерскиот тим во новата сезона, заедно со Џереми Солние, кој е познат по нискобуџетните независни филмови „Blue Ruin“ и „Green Room“.
„Многу сум среќен што ќе работам со креативци од калибарот на Махершала (Али) и Џереми (Солние). Се надевам дека сценариото ќе им помогне да ги покажат своите таленти и возбуден сум што ќе им ја раскажеме оваа приказна на гледачите”, изјави Пицолато.
Меѓу продуцентите на третата сезона се впишани имињата на Метју Меконахи и Вуди Харелсон, кои ги играа главните улоги во првата сезона и ја прославија сега веќе култната серија, како и Кери Фукунага, Стив Голин, Бард Дорос и Ричард Браун.
Сѐ уште не е познат датумот на премиерата на третата сезона, но во наредните неколку недели се очекува да се објават повеќе информации околу кастингот и приказната.