Геманските обвинители го истражувале починатиот папа Бенедикт Шеснаесетти како можен соучесник во сексуална злоупотреба додека тој беше надбискуп во јужна Германија, но истрагата била отфрлена поради недостиг на докази, соопштија во вторникот обвинителите во Минхен.
Истрагата опфатила тројца високи католички свештеници, велат истражителите. Меѓу нив се покојниот папа Бенедикт, кој како кардинал Џозеф Рацингер беше надбискуп на Минхен и Фрајзинг од 1977 до 1982 година, како и неговиот наследник, кардиналот Фридрих Ветер, а потоа и генералниот викар Герхард Грубер, кој извршуваше административни должности во надбискупијата.
Случаите еден по друг беа отфрлени откако истрагите не обезбедија соодветни докази за криминално однесување од страна на одговорните за црковниот персонал, рекоа обвинителите. Тие истражувале повеќе од 40 случаи на сомнителни кривични дела поврзани со извештајот за злоупотреба, објавен во јануари 2022 година.
Просториите во архиепископијата беа претресени во февруари минатата година. Починатиот папа Бенедикт беше на удар на критики затоа што не постапил доволно решително против свештениците обвинети за злоупотреба додека бил надбискуп и префект на Конгрегацијата за доктрина на верата помеѓу 1981 и 2005 година.
За папа беше избран во април 2005 година и поднесе оставка во февруари 2013. Почина во декември 2022 година на 95-годишна возраст. Во извештајот за сексуална злоупотреба во Архиепископијата Минхен и Фрајзинг, објавен на почетокот на 2022 година, се наведува дека меѓу 1945 и 2019 година имало најмалку 497 жртви и 235 наводни сторители на злоупотреба.
Во Германија неодамна се повеќе католички верници ја напуштаат црквата, што се смета дека е резултат на извештаите за прикривање на сексуална злоупотреба на деца и млади луѓе.
