Повеќе од 12 национални фудбалски федерации ја известија УЕФА за нивните планови да се повлечат од ФИФА која сака Светското првенство да се одржува на секои две години, објави Associated Press.
Според изворот, евентуалното повлекување од Светската фудбалска асоцијација (ФИФА), нема да влијае на учеството на клубовите и репрезентациите на турнирите под покровителство на Европската федерација.
Претходно, ФИФА ги извести националните федерации за плановите за одржување на Светското првенство на секои две години, почнувајќи од 2026 година.
Од 1930 година, Мундијалите се одржуваат на секои четири години, со исклучок на 1942 и 1946 година кога беа откажани поради Втората светска војна.
Претстојните турнири ќе се одржат во Катар (2022 година), како и во Канада, Мексико и САД (2026 година). Планот за 2030 година, кога всушност треба да се прослави 100 годишнината од Мундијалите, е турнирот да се одржи во Уругвај и Аргентина, две соседни земји кои играа и во првото финале во 1930, првенство кое се одржа токму во Уругвај.
