Бразилскиот фудбалер Филипе Кутињо нема да може да игра до крајот на сезоната поради повреда, а со тоа Барселона ќе заштеди дури 20 милиони евра.
Кутињо се повреди и затоа нема да може да ја достигне бројката од 100 натпревари во дресот на каталонскиот клуб, а доколку се случеше тоа, Барса ќе мораше да му плати 20 милиони евра на Ливерпул. Тоа е бонусот што е дел од договорот меѓу двата клуба.
Бразилецот нема одиграно натпревар од декември, а оваа сезона има само 14 настапи, или вкупно 90 од потписот за Барса.
Каталонскиот клуб му плати на Ливерпул 120 милиони евра во 2018 година, плус дополнителни 40 милиони бонуси од кои „црвените“ веќе добија 15 милиони.
Пандемијата на коронавирус ѝ зададе тежок удар на Барселона, која летово мора да собере пари за да си ги среди сметките, па затоа се спомнува и заминување на Кутињо од клубот.
Каталонците се надеваат дека Кутињо ќе блесне на Копа Америка во јуни, со што ќе привлече заинтересирани клубови.
