Пожарите во Австралија создаваат огнено торнадо

Големите пожари што ја уништуваат Австралија произведуваат толку многу топлина што создаваат огненo торнадо.

Противпожарната служба на Нов Јужен Велс предупреди дека крајбрежниот пожар создава микро-клима на 287 километри јужно од Сиднеј.

– Тоа е многу опасна ситуација. Следете ги условите околу вас и преземете соодветни мерки, објави противпожарната служба на социјални мрежи.

Пожарите, потпомогнати од високите температури и силниот ветер, продолжуваат да пустошат на источниот брег на Австралија.

Австралиските власти велат дека очекуваат дека пожарот ќе продолжи да се шири.

Шеснаесет пожари во австралиската држава Викторија се обележани со највисоко ниво на опасност и луѓето во тие области се евакуирани.

Во Нов Јужен Велс има 12 активни и големи пожари, а пожар има на повеќе од 100 локации во двете држави.

Откако избувнаа нови пожари и некои од постојните се вон контрола, министерот за транспорт на Нов Јужен Велс, Ендру Констанс, ја нарече ситуацијата катаклизмична.

– Морам да бидам искрен, ова не се шумски пожари, ова е атомска бомба, рече Констанс.

Премиерката на Нов Јужен Велс, Гладис Берџиклиан изјави дека ситуацијата со пожарот е „многу променлива“.

– Пред нас е долга ноќ и најлошото допрва треба да се случи, рече Берџиклиан.

Австралискиот премиер Скот Морисон истакна дека досега загинаа 23 лица, од кои дванаесет загинаа оваа недела.