Познатата карта на светот, која наводно потекнува од 16 век, а на која е прикажан новооткриениот континент „Америка“ е фалсификат, објави Баварската државна библиотека, која ја купила картата во 1990 година за тогаш астрономски два милиони германски марки.
За картата на светот на германскиот картограф Мартин Валдземилер, се верувало дека била изработена во 1507 година, но всушност излегло дека станува збор за копија на мапата чиј оригинал се наоѓа во Универзитетот Минесота во Соединетите Американски Држави.
Копијата која ја купила Баварската државна библиотека исчезнала околу 1960 година.
Сомненијата за автентичноста на баварската карта се појавиле кога на аукција неодамна била понудена слична карта на светот.
Со форензичка анализа заклучиле дека двете карти се копија на автентичната карта на Валдземилер, која се чува во Минесота.
Се сметало дека примерокот кој го поседува Баварската библиотека е еден од шесте оригинали.
Картата на Валдземилер позната е по тоа што на неа за прв пат во историјата бил прикажан тогаш новооткриениот континент наречен „Америка“.
Валдземилер погрешил, односно тој верувал дека тој континент го открил Америго Веспучи, а не Колумбо, па му го дал името по него.