Познати финалистите на УС опен, Синер постигна историски успех за италијанскиот тенис

Во ноќта зад нас се одиграа полуфиналните натпревари на УС опен во сингл за мажи, а пласман во големото финале на последниот Грен слем турнир во сезоната изборија Јаник Синер и Тејлор Фриц.

Синер, кој моментално е играч број еден во светот, својата одлична сезона ја продолжи со пласман во финалето на УС опен со победата од 3:0 над Британецот Џек Дрејпер, во сетови 7:5, 7:6 и 6: 2.

Првите два сета донесоа вистинска драма, а Синер ги доби во возбудливи финиши со освојување на клучни поени. По победата со 7:5 и 7:6 во првите два сета, најдобриот светски играч лесно со два брејка го приведе и третиот сет.

Така, Синер стана, колку и да звучи нереално за оваа голема земја, првиот Италијанец досега во финале на УС опен.

Таму ќе игра против Тејлор Фриц, подобар од американскиот маратон што го гледавме до доцна во ноќта во Њујорк.

Фриц по големиот пресврт со 3:2, по сетови 4:6, 7:5, 4:6, 6:4 и 6:1 го совлада сонародникот Френсис Тиафо за 3 часа и 21 минута на теренот.

Така, Фриц ја оправда улогата на фаворит, но по еден дуел во кој Тиафо ги промаши шансите и пропушти ситуација во која неколку поени можеа да му го донесат резултатот од кариерата.

Големото финале на Синер и Фриц е закажано за утре од 20:00 часот. Финалето во женска конкуренција е закажано за вечерва, кога од 22 часот се среќаваат Џесика Пегула и Арина Сабаленка.