Норвешка не ѝ дозволи на Германија да се избори во полуфинале, исто како и Црна Гора која ѝ направи услуга на Шпанија победувајќи ја Шведска.
Група 1
Холандија ја оствари потребната победа против Јужна Кореја и остана да се надева дека Германките нема да триумфираат над Норвешка. Лоис Абинх со 11 голови беше најефикасна, а се истакна и најдобриот стрелец досега на првенството, Кореанката Ју Ун-хи која погоди 9 пати и го заврши Мундијалот со 69 голови.
Холандија - Јужна Кореја 40:33
Откако Холандија не киксна со Јужна Кореја стана јасно дека Србија нема шанси за полуфинале. Во интересен натпревар против Данска на кој секоја репрезентација доби по едно полувреме, на крајот се заврши со поделба на бодовите.
Србија - Данска 26:26
Германките мораа да победат против силната Норвешка за да дојдат до шанса да се борат за медал, меѓутоа сѐ што успеаја да направат беше да водат неколку минути, а во два наврата и со два разлика. Од средината на првиот дел Норвежанките ја презедоа контролата и резултатски до крајот одржуваа темпо на кое Германија не можеше да парира.
Норвешка - Германија 32:29
Конечна табела:
1. Норвешка 8
2. Холандија 6
3. Србија 5
4. Германија 5
5. Данска 4
6. Јужна Кореја 2
Група 2
Домаќинот Јапонија во голем стил го заврши Мундијалот. Со дури 17 разлика ја совлада Романија, а Харуно Сасаки со 8 и Јуи Сумани со 7 беа најефикасни.
Романија - Јапонија 20:37
Откако Шпанија сабајлево беше преслушана од Русија, Швеѓанките добија шанса со победа над Црна Гора да се најдат во полуфиналето. Но, иако елиминирани, Црногорките одиграа одлично и на крајот се изборија за натпревар за 5-то место. Шведска ја запре Радичевиќ, но ја замени расположената Мајда Мехмедовиќ која со 7 погодоци заедно со Лин Блом беше најефикасна.
Црна Гора - Шведска 26:23
Конечна табела:
1. Русија 10
2. Шпанија 7
3. Црна Гора 6
4. Шведска 5
5. Јапонија 2
6. Романија 0
Во полуфиналето во петок ќе се сретнат Норвешка - Шпанија и Русија - Холандија. Истиот ден прво за 7-мо место ќе играат Германија и Шведска, додека за 5-тото ќе се борат соседите Србија и Црна Гора. Финалето е в недела од 12.30 часот по македонско време.