По неколку недели исполнети со шпекулации и само неколку потврдени детали, компанијата Huawei реши да соопшти неколку информации повеќе за нивниот нов модел Nova 4, за кој беше потврдено дека ќе се појави на пазарот со супермоќна камера од 48MP.
Дизајнот на Nova 4 е многу сличен со новиот модел на кинеската компанија Honor – View 20. Двата „братски модели“ ќе имаат заеднички карактеристики, бидејќи и двата доаѓаат со екран распространет по целата предна страна на телефонот и ќе го немаат досега многу популарниот „notch“ на врвот на екранот.
Наместо „notch“, Huawei Nova 4 доаѓа со „дупка“ во екранот во која е сместена селфи камера од 25MP, додека на задниот дел се наоѓа долго најавуваната камера со три леќи, опремена со сензор од 48MP. Минатата недела од Samsung најавија дека ќе имаат слично решение за задната камера, со таа разлика што Nova 4 ќе има нешто помал отвор за камерата.
За разлика од Honor View 20, кој доаѓа со процесор Kirin 980, во Nova 4 ќе биде нешто постариот процесор Kirin 970, со кој се опремени и моделите Honor View 10 и Huawei P20 Pro.
Nova 4 има екран од 6,4 инчи со резолуција од 2.310 х 1080 пиксели, потоа 8GB RAM, 128 GB внатрешна меморија и скенер за отпечатоци од прст на задната страна. Притоа, тој има батерија од 3.750 mAh, додека полначот од 18W има поддршка за брзо полнење преку USB-C конектор.
Моделот со овие карактеристики ќе се продава по цена од 490 долари, додека поевтината варијанта со камера од 20MP ќе се продава по цена од 450 долари. Набрзо откако ќе започне продажбата во Кина, Huawei Nova 4 ќе се појави и на европскиот пазар.
