Никола Тесла е еден од најголемите научници на преминот од 19-тиот во 20-тиот век, најпознат по неговиот придонес во проектирањето на модерниот електроенергетски систем на наизменична струја.
Тој беше физичар, машински и електроинженер, пронаоѓач и футурист и можеше да се пофали со речиси едетична меморија. Тој зборуваше осум јазици и имаше 300 патенти до крајот на својот живот. Неговото наследство доживеа големо заживување во последниве години бидејќи името Тесла стана „технолошка мода“ што се користи за именување на позната компанија токму затоа што неговите предвидувања за моќта и комуникацијата се остварија.
Имено, во интервјуто со Џони Б. Кенеди за списанието Collider, објавено на 30 јануари 1926 година, еден цитат покажува колку Тесла бил пророк кога станува збор за развојот на технологијата. Во интервјуто од пред 98 години, тој сумирал како би изгледал модерниот паметен телефон.
„Кога безжичноста ќе се примени на совршен начин, целата земја ќе се претвори во огромен мозок, каков што навистина е, и сите нешта се честички на вистинска и ритмичка целина. Ќе можеме веднаш да комуницираме меѓу себе, без оглед на оддалеченоста. И не само тоа, туку преку телевизија и телефонија ќе можеме совршено да се гледаме и слушаме како да разговараме лице в лице. Инструментите со кои ќе можеме да го направиме тоа ќе бидат неверојатно едноставни во споредба со нашиот сегашен телефон. Човек ќе може да го носи во џебот од елекот“, пренесува Big Think, а целото интервју за магазинот Collier е во дигиталната архива на The Library of Consciousness.
