Новозеландската премиерка Џасинда Ардерн денеска соопшти дека ја откажала венчавката затоа што земјата продолжува да се бори против новиот бран случаи на варијанти на омикрон.
Говорејќи на редовна прес-конференција за COVID-19, Ардерн рече дека здравствените власти пријавиле девет случаи на омикрон во Мотуека во едно семејно домаќинство.
Семејството минатиот викенд отпатувало во Окленд за да присуствува на свадба, погреб, забавен парк и туристичка атракција, што ја поттикна земјата да премине на највисоко ниво на ограничувања.
Ардерн им рече на новинарите: „Мојата венчавка нема да се случи, па им се придружувам на многу други Новозеланѓани кои доживеале такво искуство како резултат на пандемијата“.
На прашањето како се чувствува за нејзината одлука да ја откаже венчавката што требаше да се одржи летово, Ардерн одговори: „Тоа е животот“.
Нов Зеланд од денеска преминува во црвено, највисоко ниво на тревога поради откривањето на вкупно 12 случаи на зараза со омикрон во земјата.
„Знаеме дека зараза со омикрон веќе се појави и на Северните и на Јужните Острови и оти се пријавени неколку инфекции на неколку места“, рече Ардерн. Таа истакна дека најмалку двајца носители на новиот вид учествувале на масовни настани и најверојатно го пренеле вирусот на значителен број луѓе во земјата.
„Нашата стратегија е да го забавиме ширењето на сојот омикрон и вклучува мерки како што се употреба на маски и ограничување на бројот на учесници на сите видови настани, што исто така ќе го намали товарот врз нашиот здравствен систем. Ќе продолжиме брзо да ги тестираме луѓето, да ги следиме нивните контакти и да ги изолираме“, нагласи Ардерн.
Таа ги повика жителите на земјата што поскоро да примат бустер вакцина, доколку поминале најмалку четири месеци од примањето на втората доза од вакцината.
„Треба да ги искористиме следните недели пред значително да се прошири вирусот за да им помогнеме на што е можно повеќе луѓе да добијат бустер доза. Местата за вакцинација денеска се отворени низ целата земја и ќе го зголемиме капацитетот во текот на целата недела“, рече Ардерн.
Минатиот месец Нов Зеланд го одложи постепеното повторно отворање на границите до крајот на февруари поради загриженоста за варијантата омикрон.
Крис Хипкинс, државен министер за одговор на COVID-19, рече: „Чекањето до крајот на февруари ќе ја зголеми севкупната заштита на Нов Зеланд и ќе го забави евентуалното ширење на омикрон. Нема сомнеж дека ова е разочарувачки и ќе наруши многу планови за одмор, но важно е овие промени да се разјаснат денес за луѓето да имаат доволно време да размислат за промена на плановите“.
Хипкинс, исто така, рече дека кабинетот на Нов Зеланд се согласил на други мерки на претпазливост, вклучително и намалување на интервалот помеѓу втората доза на вакцината против COVID-19 и дополнителната вакцина од шест месеци на четири месеци и зголемување на потребниот престој во карантин за патниците кои се враќаат од 7 на 10 денови.
