Премиерот на најголемиот остров во светот изјави дека неговите жители не сакаат да бидат „ни Американци, ни Данци, туку Гренланѓани“.
„Ние не сакаме да бидеме ни Американци, ни Данци, ние сме Гренланѓани“, рече Муци Инекунаалук Ееде еден ден откако американскиот претседател Доналд Трамп го повтори својот интерес за преземање на автономната територија во рамките на Данска.
„Американците и нивниот шеф мора да го разберат ова“, напиша Ееде на Facebook, шест дена пред парламентарните избори.
„Ние не сме на продажба и не може едноставно да нè преземат“, заклучи премиерот на Гренланд.
Трамп во вторникот во обраќањето пред Конгресот рече дека владата работи на преземање на Гренланд, пренесе Reuters. „Мислам дека ќе го добиеме, вака или онака, ќе го имаме“, рече американскиот претседател.
Тој им рече на Гренланѓаните дека со САД ќе бидат „безбедни и просперитетни“ и дека нивниот остров „ќе достигне височини за кои никогаш не верувале дека се можни“. „Тоа е многу мало население, но многу, многу големо парче земја, многу, многу важно за воената безбедност“, рече Трамп.
„Ние силно го поддржуваме вашето право да одлучувате за вашата иднина, и ако одлучите да го сторите тоа, добредојдени сте во Соединетите Американски Држави“, заклучи тој.
Анкетите покажуваат дека мнозинството Гренланѓани, речиси 57.000, се против приклучувањето кон САД, но дека повеќето од нив се залагаат и за независност од Данска.
