Претседателот на Државната изборна комисија (ДИК), Александар Чичаковски, и членовите Виолета Дума и Игор Милев поднесоа оставки.
Ваквиот потег следува откако во јавноста излегоа информации дека во изминатите 18 месеци во три наврати членовите на ДИК си доделиле вкупно 12 надоместоци.
Чичаковски претходната недела објави дека ќе ги донира парите на невладината „Полио плус“, за проекти за лицата со хендикеп. Милев и Дума ги вратиле бонусите во Буџетот.
Мандатот на актуелниот состав на ДИК истекува во 2020 година.
Според Одлуката за исплата на надоместоците за спроведувањето на последните локални избори и Правилникот за определување надоместоци, донесени на затворена седница на 16 ноември, членовите на ДИК си изгласале бонуси во висина од четири и две дополнителни плати.
Четири дополнителни нето исплатени плати добиле претседателот на ДИК, Александар Чичаковски, заменик-претседателот Реџеп Прекопуца, како и членовите на комисијата Атанас Урумов, Виолета Дума, Игор Милев, Субхи Јакупи, Сашо Срцев и Силвана Бонева. Бедредин Ибраими, предложен од ДПА, и Ермира Асани Салија, која седна на неговото место предложена од Беса, добиле дополнителни две нето исплатени плати.
Инаку, за закажаните, а неодржани избори во април минатата година членовите на ДИК си поделиле три плати. Пет плати бонус, пак, зеле за предвремените парламентарни избори, што ако се сумира вкупно, станува збор за 12 дополнителни плати во периодот од година и половина, односно 30 плати за 18 месеци.
