Нигерискиот претседател Мухамаду Бухари вчера мораше да одговори на гласините за неговото вистинско постоење, откако почнаа да кружат објави во медиумите дека умрел и бил заменет со клон.
„Едно од прашањата што ми беа поставени денеска на средбата со Нигеријците во Полска беше дали сум бил клониран или не“, рече Бухари.
„Ваквите неинформирани гласини не ме изненадуваат, додека морав да се повлечам на кратко поради болест лани, многу луѓе сакаа да умрам“, рече тој и им порача на медиумите да не бидат неписмени.
„Ова сум вистинскиот јас, ве уверувам. Наскоро ќе го прославам 76-от роденден и ќе продолжам храбро напред“, рече претседателот.
Бухари, кој се надева дека догодина пак ќе биде избран за претседател на Нигерија, го доби првиот мандат во 2015 година.
Тој лани се лекуваше во Лондон од засега непозната болест, поради која многу се измени физички, па неговите политички ривали почнаа да коваат теорија на заговор дека претседателот починал и е заменет со клон.
