За првпат двајца патници патуваа со Virgin Hyperloop капсула која се движи со помош на магнетска левитација и брзина од 172 км/ч. Сепак, ќе мине година додека овој супербрз превоз на иднината стане нешто што би можеле секојдневно да го користиме.
Компанијата на милијардерот Ричард Бренсон на полигон кај Лас Вегас изврши безбедносен тест во кој патниците патуваа 172 км/ч. Hyperloop е футуристички превоз на иднината со кој луѓето би патувале во вакуумска цевка со брзина до 1.000 км/ч. Тие вагони би можеле да достигнат ваква брзина со помош на магнетска левитација, иста технологија која се користи во разните железнички системи, но овде се наоѓа во вакуум.
Доколку успеат да ја развијат и докажат технологијата, а потоа и да изградат ваков систем, патувањето меѓу Њујорк и Вашингтон би траело половина час.
Virgin досега направи повеќе од 400 тестирања, но без луѓе. Двајцата патници кои се возеа се Џош Геџел, коосновач на Virgin Hyperloop и Сара Лучијан, директор за патничко искуство во Virgin Hyperloop.