Резултатите од истражувањето на клучните стратегии и наративи на македонските антиродови движења објавени во трудот насловен „Кој се плаши од родот?“, на авторките Ирена Цветковиќ и Мања Величковска, беа презентирани денеска на настан на кој присуствуваа претставници на невладиниот сектор, новинари и заинтересирани граѓани.
Целта на публикацијата „Кој се плаши од родот?“ е да им помогне на бранител(к)ите на човекови права подобро да ги разберат антиродовите кампањи, да ги поддржи во идентификувањето на начини за спротивставување на нив и да придонесе во унапредувањето на човековите права за сите.
Истражувањето цели кон обезбедување на релевантни податоци, анализи и знаења за хегемониските стратегии на врамување, репрезентација и дискурзивна конструкција на жените и сексуалните и родови малцинства во јавните дискурси од страна на антиродовите актери, како и да понуди трансформации и да ја зајакне мобилизацијата помеѓу прогресивните сили во нашето општество.
По промоцијата следуваше панел-дискусија, каде авторките заедно со Андријана Папиќ Манчевска (претставничка од ХЕРА – Асоцијација за здравствена едукација и истражување) и Сара Миленковска (претставничка од Националната мрежа против насилство врз жените и семејно насилство) дискутираа за ефектите врз демократијата, човековите права и родовата еднаквост предизвикани од антиродовите мобилизации во нашето општество.
Трудот „Кој се плаши од родот?“ во целост можете да го прочитате на ОВОЈ ЛИНК.
