Непосредно пред 20-годишнината од смртта на принцезата Дијана, британскиот Channel 4 најави дека ќе го емитува документарниот филм „Diana: In Her Own Words“, но нејзините пријатели сега апелираат до ТВ-каналот да не се емитува документарецот бидејќи содржи контроверзни видеоснимки на кои Дијана зборува за нејзиниот брак со принцот Чарлс.
Филмот е направен врз основа на видеа снимени во периодот од 1992 до 1993 година со Питер Сетелен, професор на Дијана. Овие видеоснимки се направени во Кенсингтонската палата и досега не биле објавени. Во нив Дијана зборува за брачните проблеми со Чарлс и го критикува британското кралско семејство.
„Сметам дека тоа што ќе го емитуваат е неморално. Дијана била снимана во моменти кога нејзиниот брак беше завршен и таа никогаш немаше намера да се објават тие снимки“, рече кралската биографка Пени Џунор и додаде дека документарецот според неа е „експлоатација“.
Роза Монктон, блиска пријателка на Дијана, изјави дека објавувањето на тие видеоснимки ќе биде предавство на приватноста на Дијана.
„Тие не се наменети за јавноста. Тоа ќе биде предавство на нејзината приватност и приватноста на семејството.“
Од друга страна, од Channel 4 истакнуваат дека овој документарец нуди единствена можност да се ѕирне во животот на Дијана и велат дека снимките се неверојатен историски документ што овозможува да се состави еден нов портрет на принцезата Дијана.
