Стотици луѓе низ Русија беа уапсени вчера откако учествуваа во антикорупциски протести во кои се бараше оставка на премиерот Димитриј Медведев. Најмногу уапсени има во Москва, а меѓу нив е приведен и опозицискиот лидер Алексеј Навални, но и многу млади луѓе.
Фотографот Максим Шипенков од ЕПА сними трогателна фотографија од неколку полицајци кои приведуваат млада девојка. Тие буквално ја носат девојката на раце, а нејзиниот трогателен изглед кажува сè. Иако многумина на интернет се прашуваат зошто девојката е приведена, подоцна таа е идентификувана како Олга Лозина која во интервју за Meduza откри неколку работи за настанот.
Таа вели дека заедно со мајка си и сестра си биле во McDonalds и се враќале кон дома кога се нашле на протестот. Полицијата одеднаш почнала да ги приведува луѓето, а нејзината мајка ги прашала полицајците зошто приведуваат младо момче и го пикаат во полициско комбе. Полицајците веднаш ја привеле неа, но и сестра ѝ. Збунетата девојка почнала да ги прашува полицајците зошто ги приведуваат, а потоа се нашла во ситуацијата од фотографијата.
„Сите бевме брутално фрлени во полициско комбе, кое беше преполно, и однесени во полициска станица, не ни кажуваат кога ќе не пуштат“, објаснува Олга, пренесува Mashable.