Налетавме на емисија од 1978 година на Македонската радио телевизија за изградбата на рекреативното езеро Треска крај Скопје која не можевме, а да не ја споделиме поради актуелноста на Треска.
Скопјани пред земјотресот имале многу плажи на Вардар кои активно се користеле. Но, со урбанизацијата на градот по земјотресот во реката завршила сета канализациона мрежа, по што водите на Вардар повеќе не биле чисти за бањање. На скопјани им било потребно решение за разладување во жешките денови, а решението се нашло во вештачко езеро.
Со површина од 136.000м², длабочина од 1,6 до 3 метри и капацитет од 10.000 капачи, езерото Треска било изградено во 1978 година со самопридонес на жителите на главниот град.
Се користело активно сѐ до 1998 година кога поради загаденоста на водата било затворено како капачки објект.
Денес, наместо езерото Треска да се обнови, читаме дека Општина Сарај ги брка сопствениците на приколки за на тоа место да се гради некаков друг објект, на местото кое го изградија скопските ударници на своја иницијатива, со свои средства и свој труд.