Најавениот циклон Фобос пристигна на Балканот, во Црна Гора корнеше бандери и стебла, во Хрватска наврнаа 30 см снег, а во Македонија УХМР најави поројни дождови.
Обилните дождови во текот на ноќта предизвикаа бројни проблеми низ улиците на Црна Гора, а силен дожд и поплавени улици не го одминаа ни главниот град.
На социјалните мрежи се објавени фотографии и видеа од состојбата на терен, сообраќајот се одвива отежнато.
Од циклонот Фобос е зафатен и Херцег Нови, каде силниот ветер, обилните дождови и грмотевиците предизвикаа поплави, соборени стебла и недостиг на електрична енергија. Ветерот достигнал брзина до 90 км/час.
Во Хрватска наврна снег до 30 см, а нов снег се очекува и во следните денови. Во некои делови на земјата ќе има невреме со силен ветер, кој ќе слабее до крајот на денот.
Како што пренесуваат медиумите, делови од Хрватска се зафатени од снежно невреме. На повисоките места обилно паѓа снег, а на некои места има веќе се формирала покривка од над 30 сантиметри.
Според најава на српските метеоролози, во оваа земја во вторник и во среда ќе дуваат силни ветрови, на некои места се најавени и обилни дождови,
Под влијание на циклонска активност времето во Македонија денес ќе биде облачно со врнежи од дожд, кои попладне и во текот на ноќта на повеќе места ќе бидат обилни, предупредија од УХМР. Локални врнежи од дожд ќе има и во понеделник, особено претпладне. На повисоките врвови на северозапад ќе врне снег.
Поради тоа што постојат изгледи и веројатност локално врнежите да бидат интензивни и поројни, Центарот за управување со кризи предупредува на можност од брзо зголемување на водостоите на помалите реки и суводолиците со можност за нивни локални излевања, а исто така можни се и локални проблеми во дел од градските урбани средини.