Првите примероци на врвната верзија на лимузината на Tesla стигнаа до нивните сопственици.
Model S Plaid беше најавен пред неколку години, а сега почнаа и првите испораки на овој фантастичен автомобил.
По тој повод, се одржа мала церемонија на која зборуваше првиот човек на компанијата, Илон Маск.
За потсетување, Model S Plaid спаѓа во самиот врв на производството на Tesla. Автомобилот има три електромотори и погон на сите четири тркала, а Маск тврди дека тој е „најстартниот производствен автомобил на денешницата“.
Електричниот погон испорачува 1.034 КС (761 kW) и му овозможува на возилото да забрза од 0-60 милји на час (0-96 км/ч) за 1,99 секунди, додека од мирување до четвртина милја (402 матри) потребни му се 9,23 с.
Максималната брзина е одредена на 322 км/ч. Сепак, оваа брзина во моментов е можна само на хартија, бидејќи бара посебен, опционален сет на гуми - кои сè уште не се ни направени.
Автономијата на возење се проценува на 628 километри, а доколку клиентот се определи за опционалниот сет на 21-инчни тркала, радиусот се намалува на 563 километри.
Инаку, Model S Plaid првично имаше цена од 119.990 долари, а Tesla ја зголеми за 10.000 долари, на 129.990 долари, пред почетокот на производството.
Американскиот производител планираше и верзија над оваа, која би носела етикета Model S Plaid +, но во последен момент се откажале од ваквата идеја.
Причината, според самиот Маск, е што „обичниот“ Model S Plaid е „толку добар автомобил“ што верзијата „плус“ не е потребна.