Компаниите ASUS и Dell на настанот CES 2023 претставија вистинско уживање за гејмерите - монитори со 500 Hz.
Иако минатата година првпат слушнавме за монитори кои се освежуваат со брзина од 500 Hz, компаниите Dell и ASUS го претворија тој сон на многу гејмери во реалност на настанот CES 2023 во Лас Вегас.
Компанијата ASUS го претстави ROG Swift Pro PG248QP, првиот гејмерски монитор во светот кој освежува со брзина не од 500, туку 540 Hz. Овој монитор го користи истиот Full HD Esports TN панел што производителот го најави минатата година, но компанијата тврди дека успеала да извлече уште 40 Hz од него за дополнително да ја подобри мазноста на движењето.
PG248QP доаѓа со Nvidia G-SYNC процесор, за да се избегнат какви било „икања“ и „кинења“ на сликата, а има и вграден Reflex Anylizer кој овозможува увид во доцнењето на системот од крај до крај. Кога станува збор за одложување, мониторот користи ECC Codec што го намалува доцнењето на звукот.
Ако сакате да ги придвижите глувчето и тастатурата поблиску до мониторот, ASUS нуди преклопни ногарки на дното што ќе ви ослободи простор, намалувајќи го отпечатокот на масата. PG248QP ќе пристигне во вториот квартал од годинава.
Иако ASUS беше првиот што објави монитор за игрици од 540 Hz, Dell ќе биде тој што ќе ја понесе титулата прв монитор од 500 Hz на продажба, бидејќи Alienware AW2524H ќе се појави на полиците во Кина веќе во февруари, односно во март во САД - датумот на лансирање во Европа сè уште не е познат.
За разлика од ASUS, мониторот Alienware користи „брз IPS“ панел произведен од AU Optronics, што значи дека AW2524H ќе има подобри бои и далеку подобри агли на гледање. Дијагоналата на екранот е 24,5 инчи, Full HD резолуција, а исто како и ASUS има поддршка за Nvidia G-SYNC.
Dell сподели малку повеќе информации за својот монитор, па знаеме дека ќе има неверојатно брзо време на одговор од 0,5 ms, 400 cd/m2 јачина на осветлување, 99% sRGB опсег на бои и фабричка калибрација. Рефлексниот анализатор е исто така вграден како кај конкурентот, но важно е да се напомене дека мониторот ќе работи на 480 Hz при нормална работа и дека ќе ја достигне рекламираната бројка од 500 Hz само во OC режим.