Припадникот на собраниското обезбедување, Абдулфетах Алими од кумановско Оризаре доби 30 дневен притвор за настаните од 27 април.
Алими ѝ беше познат на јавноста како човекот кој го спаси пратеникот Зијадин Села од напаѓачите за време на упадот во Собранието на 27 април.
„Кога влеговме, тој беше во тешка состојба. Јас го легнав на подот и ме праша ‘кој си’. Тогаш му кажав дека сум Фетах од собраниското обезбедување. Му дојде голема надеж, силна надеж. Ми рече: ‘Фетах, во твои раце сум’. Во тој момент му реков: ‘Зијадин, ако ме убијат, прости ми’“, изјави во мај Алими за „Алсат-М“.
Тој е обвинет по член 313 од Кривичниот законик.
Алими заедно со адвокатката денеска дојде во судот, од каде со полициско комбе беше пренесен во Истражниот затвор во Шуто Оризари.
Неофицијално, од него биле земени клучевите за отворање на собраниските врати.