Основниот суд Скопје 1 му определи триесетдневен притвор на разбојник кој вооружен со пиштол ограбувал аптеки во Скопје.
Основното јавно обвинителство – Скопје соопшти дека осомничениот, на возраст од 44 години, во периодот од 23 јуни до 18 јули извршил девет вооружени грабежи во аптеки.
„Надлежниот обвинител, ценејќи дека се исполнети законските основи, како и поради тоа што постојат околности што укажуваат на можно бегство на осомниченото лице, можност за попречување на кривичната постапка преку влијание врз сведоци, можност да се скрие или, пак, да го повтори делото, до Основниот суд Скопје 1 – Скопје достави предлог за определување на мерка – притвор“, соопшти Обвинителството.
Од таму велат дека Судот го прифатил предлогот и на осомничениот му изрекол притвор во времетраење од 30 дена.
