Украинските приврзаници на поранешниот грузиски претседател Михаил Саакашвили го ослободија од полициското комбе по неговото притворање под сомнеж дека помагал на криминална организација, што предизвика судири со полицијата во центарот на Киев.
Речиси 200 приврзаници на поранешниот претседател на Грузија, Михаил Сакашвили, излегоа на улиците, ги блокираа и поставија барикади во самиот центар на престолнината на Украина за да го ослободат. Полицијата користеше солзавец против демонстрантите, кои се обидуваа да спречат Саакашвили да биде одведен на испрашување. Тие бараа уапсениот поранешен претседател на Грузија да биде ослободен.
Демонстрантите ја скршија вратата на полициското возило и го извлекоа Саакашвили. Потоа го одведоа во црквата во близина, каде што тој им се обрати на приврзаниците. Тој повика на ослободување на Украина и уривање на актуелниот украински лидер, Петро Порошенко.
„Бандата на Порошенко денеска под лажни обвиненија се обидува да ме уапси и да ме исфрли од Украина. Ќе го дадам својот живот за слободна Украина. Сакам да ги повикам сите граѓани на Киев да излезат на улица, да се соберат на Мајдан и да го почнат процесот за спасување на Украина од Порошенко и неговата банда”, рекол Саакашвили.
Неколку луѓе биле повредени во судирите меѓу демонстрантите и силите за безбедност. Демонстрантите поставиле гуми, канти и стапови за да го блокираат возилото.
