Пробавме EUROVAFEL на Swisslion

По долга и оправдана пауза во рубриката „Пробавме” (ни прпа да јадеме по ресторани за да можеме да пробуваме), решивме да ја продолжиме со производи кои можат да се најдат во маркетите.

Ни се пријаде нешто благо. Влеговме во ЗУР во Влае. Изборот на опции да се одбере некое благце беше мал, а сакавме да пробаме нешто што не сме го купиле до сега. Окото ни го привлекоа EUROVAFEL на Swisslion. Пакувањето изгледа убаво, пристапна цена за пакување од 200 грама за 33 денари, купено.

Честа пракса кај кондиторските производи од овој тип е на пакувањето да се користат нашминкани фотографии или илустрации кои не соодветствуваат баш со реалноста која ќе ве дочека кога ќе го отворите пакувањето. Не интересираше дали и во овој случај ќе биде така, затоа што на илустрацијата не привлече правилната форма на вафлите и полнењето со крем:

Неправилни форми, изронети во самото пакување, кои на допир и гризање се склони на ронење. Oд нашминканата илустрација на пакувањето и производот во реалност, се разликуваат и пропорциите на парчињата. Вафлите се многу тенки и суви и веројатно затоа парчињата се склони на ронење, можеби и при самиот транспорт и складирање. Полнењето е сосема во ред, не штеделе на крем и неговиот вкус добро се чувствува.

Вкусот е сосема солиден, а земајќи ја во предвид евтината цена, заклучокот е дека за тие пари и не би можеле да очекуваме повеќе. Дали вреди за парите? Да, ако сакаш да се настегаш 200 грама благо за евтина цена. Доколку барате и естетика или врвен вкус во тоа што го јадете за уживањето да биде целосно, не ја очекувајте тука. Гризајте прецизно над чинија, доколку не сакате да имате и работа околу чистење, бидејќи на секој гриз летаат ронки.