Кливленд Кавалирс вчера одржаа итен тимски состанок во кој повеќето од играчите го обвиниле Кевин Лав дека ги лажирал здравствените проблеми за да не игра на мечот против Оклахома.
Неколку од играчите (не беа споделени имиња) го притискале раководството да бара одговорност од Кевин Лав за неговото отсуство во саботниот натпревар и тренингот во недела.
Кевин Лав ја напушти арената кратко пред натпреварот против Оклахома Сити Тандер, велејќи дека се работи за „здравствен проблем“ и дека не сака да ризикува да биде повреден подолго време.
Според еминентниот НБА инсајдер од ESPN, Ејдриен Војнаровски, состанокот бил гласен и имало бурни кавги помеѓу соиграчите. Атмосферата се смирила откако Кевин Лав го дал неговото објаснување зошто го пропуштил натпреварот, и потоа состанокот продолжил да се одвива во помалку напнато расположение. Војнаровски вели дека овој состанок треба да има позитивно влијание на сезоната на Кавалирс, кои во последните две недели се мачат да дојдат до победа.
Обвинувања за лошиот период на Кавалирс биле упатени кон многумина, од Ајзеа Томас, Кевин Лав, генералниот менаџер Коби Алтман, па дури и сопственикот Ден Гилберт.
Откако во декември имаа фантастична серија од натпревари, Кавалирс паднаа на скор од 27-18, само една победа повеќе од Мајами Хит. Во четврток гостуваат кај Сан Антонио Спарс во Тексас.
