Први проблеми за селекторот на македонската фудбалска репрезентација откако резервниот голман Божиновски излезе позитивен на COVID-19 и отпадна од списокот за претстојните натпревари.
Денеска почнаа да пристигнуваат репрезентативците во Скопје, а почнаа и првите проблеми. Голманот на Силекс, Даниел Божиновски, е првиот кој мораше да му откаже на селекторот Игор Ангеловски. Тој е позитивен на COVID-19 и дефинитивно отпаѓа.
„Голманот на Силекс во неделата при пристигнувањето во Скопје беше подложен на тестирање, а веднаш откако му беше потврден позитивниот резултат го напушти хотелот, без да има контакт со останатите лица од репрезентацијата, стручен штаб или фудбалери“, соопшти ФФМ.
„За жал, позитивен сум на коронавирус и ќе мора да поминам одреден период во карантин. Немам симптоми, но принуден сум да бидам изолиран од соиграчите во следниот период. На репрезентативните колеги им посакувам многу среќа и успех во намерата да се избориме за пласман на Европско првенство. Јас ќе бидам еден од најголемите поддржувачи“, рече Даниел Божиновски во изјава за ФФМ.
Божиновски синоќа бранеше за Силекс кој доживеа убедлив пораз од 0:3 дома против Македонија ЃП. Нема да го памети натпреварот по добро бидејќи направи кикс при водечкиот гол за гостите.
Ангеловски на списокот вклучи четворица голмани, а бидејќи останатите тројца се во комбинација за баражот против Грузија в четврток, нема да повика нов. Но, нов голман веројатно ќе мора да биде повикан за натпреварот в недела против Естонија во Скопје во рамките на 5. коло од Лигата на нации. Името, поради суспензија единицата Столе Димитриевски нема да биде во комбинација, а правилата на УЕФА налагаат да мора да има тројца голмани во составот.
За потсетување, Македонија има на располагање одличен голман во Давид Митов Нилсон, кој го чува голот на норвешки Сарпсборг, но поради непиознати причини селекторот упорно не му упатува повик.