Без својот најдобар играч Лацио вечерва ќе му се спротивстави на белгиски Бриж во 2. коло од Лигата на шампионите.
По одличниот старт и победата од 3:1 над Борусија од Дортмунд сега Лацио е на маки на гостувањето во Белгија.
Поради позитивен тест синоќа за Бриж не отпатува голгетерот Чиро Имобиле, како и Луис Алберто, Лукас Лејва, Томас Стракоша и Мануел Лаѕари, што ќе биде голем хендикеп за „Бјанкочелестите“ кои важеа за фаворити.
Денеска се чекаа нови тестови со надеж дека ќе покажат дека вчерашните биле лажно-позитивни и Имобиле да може накнадно да летне за Бриж, но сепак до тоа не дојде.
Затоа, пак, добра вест за Симоне Инѕаги е денешниот негативен тест на бразилскиот играч од средината, Андреас Перејра, кој веднаш летна кон Бриж и ќе биде во комбинација вечерва.
„Не очекувавме вакво сценарио. Тргнавме добро против Борусија и сакавме да дојдеме тука комплетни. За жал, ситуацијата во моментов е таква. Сигурен сум дека кој и да истрча на терен ќе го даде максимумот во овој дрес. Со сигурност ќе извадам компетитивен состав кој ќе ѝ се спротивстави на една одлична екипа каква што е Бриж“, изјави синоќа Инѕаги.
Бриж го пречекува Лацио вечерва од 21 часот.