Побарувачката за електрични возила е сѐ поголема, а најголемите светски економии сметаат дека токму овие автомобили ја претставуваат иднината на превозните средства.
Кина е најголем потрошувач на електрични возила, купувајќи повеќе од половина од произведените автомобили во третиот квартал од годината.
Продажбата на електрични возила и хибриди ја надмина бројката од 287.000 продадени единици во тримесечниот квартал кој заврши во септември, што претставува пораст од 63% во однос на истиот квартал минатата година и 23% во однос на претходниот квартал од 2017 година. Сето ова беше наведено во извештајот што го даде Bloomberg New Energy Finance (BNEF).
Кина е одговорна за повеќе од половина од вкупната продажба на глобално ниво, што најмногу се должи на мерките кои тамошната влада ги презема со цел да го ограничи и намали загадувањето.
„Кинеската влада е многу фокусирана на зголемување на пазарот на електрични возила“, вели Александра О’Донован, транспорт-аналитичар во BNEF и еден од авторите на извештајот.
Пазарот за електрични автомобили се проширува од ден на ден, со менувањето на инфраструктурата на градовите, но и со склоноста на автомобилските компании кон произведување на вакви автомобили.
Неколку светски влади веќе работат на отстранување на автомобилите кои работат на бензин и дизел мотори. Франција и Велика Британија најавија дека ќе ја забранат продажбата на дизел возила до 2040 година, додека Холандија ќе ги забрани бензинците и дизелашите уште во 2030 година.
Европа е вториот најголем пазар за електрични возила, со 24% од вкупната продажба, а веднаш по нив следува Северна Америка.
