Филм & ТВ

Продуцентите на „James Bond“: Жена нема никогаш да ја добие улогата на тајниот агент

9. октомври 2018 - 12:08 | К.З.

Филмската франшиза за тајниот агент 007 последните неколку години е опкружена со шпекулации околу тоа кој ќе ја преземе главната улога по заминувањето на Даниел Крег. Откако Идрис Елба самиот изјави дека нема да биде новиот Џејмс Бонд, сега беше одбиена и идејата дека жена некогаш би можела да се појави во улогата на најпознатиот таен агент во светот.

Барбара Броколи, која веќе 25 години е извршна продуцентка на серијалот филмови за Џејмс Бонд, ја сруши надежта дека некогаш би можеле да видиме жена во улогата на костумираниот таен агент.

„Бонд е маж. Тоа е машка улога пишувана за машки актер и веројатно во иднина ќе го глумат само мажи. Не гледам шанса за актерка да се најде во главната улога“, истакна Броколи.

Во интервјуто за Guardian, Барбара Броколи исто така одговори на современите критики кои тврдат дека филмовите за Џејмс Бонд се мета на феминистите, кои го бојкотираат филмот поради однесувањето на главниот лик.

„Сценариото за филмовите за Бонд потекнува од книга напишана во 1950-тите години од минатиот век, така што постојат одредени карактеристики на ликот кои нема да се променат“, додаде таа.

Минатиот месец беше најавено дека режисерот на 25-тото продолжение на „James Bond“ ќе биде Кери Фукунага, кој доаѓа на местото на Дени Бојл, откако тој се откажа од позицијата поради креативни разлики со студиото.

Коментирај