Противпожарната служба на Загреб на социјалните мрежи објави проекција за тоа какви последици би претрпел главниот град на Хрватска ако се случи експлозија како онаа во Бејрут.
„Експлозијата во Бејрут беше една од најсилните во историјата, во мирнодопски услови. Ако ги ставиме податоците за моќта и последиците од експлозијата во компјутерска програма и ги примениме на центарот на Загреб, добиваме многу пластичен приказ на оваа страшна трагедија“, објавија пожарникарите.
Според направената компјутерска проекција, сите во радиус од околу 300 метри би настрадале во експлозијата. Во радиус од 450 метри луѓето би имале значителни оштетувања на дишните органи.
Оние кои би се нашле во радиус од 2 километри можно е да имаат привремено губење на слухот.
Бројот на загинати во експлозијата што се случи минатиот вторник се искачи на 158, а повредени се повеќе од 6.000 лица, соопшти либанското Министерство за здравство. Инцидентот се случи во магацин каде биле складирани 2.700 тони амониум нитрат, кој бил складиран шест години, откако бил конфискуван од царинската служба.
Граѓаните на Бејрут излегоа на масовни протести разгорени од незадоволството од начинот на кој власта изреагира на смртноносната експлозија.
Премиерот на Либан, Хасан Диаб, завчера најави дека ќе предложи одржување предвремени избори во земјата, откако експлозијата во центарот на Бејрут ја продлабочи кризата во земјата.