Проколнатиот брод на Тито Lybov Orlova со години лута во Атлантскиот Океан, а последен пат бил забележан 2013 година, 1000 километри од ирски брег. Сега се шпекулира дека токму овој брод пред неколку дена бил забележан на брег во Калифорнија, иако тоа звучи речиси невозможно.
MV Lybov Orlova, бродот кој го доби името по познатата руска театарска актерка, изграден е во 1976 година по нарачка на руска компанија која имала за цел бродот да биде главно превозно средство за екскурзии по Антарктикот.
„Се на тие бродови беше од домашно производство. Челик, бродски мотори, инсталација. Единствено што Русите бараа на оваа серија на патничко – теретни бродови беше тоа што навигационите уреди и комплетната опрема во кујната мораше да биде нивна“, изјави Божидар Девчиќ, некогаш шеф на Техничкиот уред.
Југословенскиот брод со години успешно одолевал и во тешки услови, па издржал се – од невремиња до големи замрзнати површини, а своите задачи успешно ги вршел се до 2006 година.
Сепак, поради долгови на сопственикот на компанијата кои изнесувале 251.000 долари, бродот бил задржан во пристаништето Сент Џон во 2010 година.
Две години подоцна бил продаден на компанијата Neptune International Shipping.
Само ден откако бродот бил ослободен од пристаништето, се скинало безбедносното јаже. Екипажот безуспешно се обидел повторно да го врати напуштениот брод, но високите бранови и тешките удари на ветер ги спречиле во тоа.
Набргу бродот влегол во меѓународните води и канадското Министерство за сообраќај истакнало дека тој веќе не претставува опасност за канадските компании, поради што го напуштиле.
Во претходните неколку години бил забележан како бесцелно лута по Атлантикот.
Бродот од југословенско производство бил тежок 4.000 тони, а можел да пренесе 110 патници и членови на екипажот.
Иако се шпекулираше дека токму овој брод се нашол на брегот во Калифорнија, сепак набргу било утврдено дека тоа е речиси идентичен брод кој бил на поранешна мафијашка коцкарница на вода и дека нема врска со бродот со југословенско производство.