Десетици италијански полицајци и социјални работници распоредени во центрите за мигранти во Албанија од страна на италијанската крајнодесничарска влада се вратија дома, бидејќи овие објекти се празни со недели.
Нешто повеќе од еден месец по отворањето на центрите за баратели на азил во Албанија, повеќе од 50 полицајци беа вратени назад во Италија, додека десетици социјални работници заминаа во текот на викендот, а нивното присуство во Албанија се сметаше за непотребно.
Од отворањето на 11 октомври, само 24 баратели на азил дојдоа во центрите во Албанија. Петмина мигранти поминале помалку од 12 часа во притворот, додека другите останале нешто повеќе од 48 часа.
Сите тие беа префрлени во Италија откако италијанските судии утврдија дека е незаконски да ги приведат во Албанија.
Притоа, судиите ја потврдија пресудата на Судот на правдата на ЕУ од 4 октомври според која земја надвор од блокот не може да се прогласи за безбедна освен ако целата нејзина територија не се смета за безбедна.
Како резултат на тоа, центрите што претседателката на Европската комисија Урсула фон дер Лајен ги претстави како нов модел за формирање центри за обработка и задржување на баратели на азил надвор од ЕУ се празни повеќе од еден месец.
Владата најави дека центрите во Албанија ќе останат отворени и оперативни и дека трансферите во Италија се направени според потребите на персоналот.
Сепак, кредибилитетот на италијанската премиерка Џорџа Мелони е загрозен откако таа ја направи имиграцијата централно прашање на кампањата.
Во минатото таа ги критикуваше своите претходници за трошење на јавни пари за управување со миграциската криза.