На 15 јуни (среда) од 20 часот во Јавна соба ќе се одржи промоција на првиот прирачник по драмска уметност за наставници на македонски и албански јазик, во издание на „Театар за сите“.
Автор и приредувач на прирачник е Милош Б. Андоновски, режисер и професор.
Промотори на публикацијата се: Ана Стојаноска, писателка, театролог и професорка на Факултетот за драмски уметности – Скопје, и Бесфорт Идризи, актер, режисер и доцент на Факултетот за драмски уметности – Скопје, а воедно и преведувач и адаптатор на прирачникот на албански јазик.
Модератор на настанот е актерката Ангела Стојановска.
Во светски рамки, појавата на театарот во образовнието датира од средината на XX век, а за инаугуратор на оваа практика се смета Брајан Веј. Театарската уметност во РСМ, во средношколскиот (гимназиски) образовен систем, се воведува дури во учебната 2001/02, како изборен предмет со назив Драмска уметност, во јазично - уметничкото подрачје, комбинација Б. Оттогаш не постои ниту учебник за учениците, ниту какво било дидактичко помагало за наставниците.
„Овој прирачник се обидува да го надомести она кое минатите генерации го испуштиле по предметот Драмска уметност, со тоа што на идните генерации ќе им овозможи, ако ништо друго, барем поразнолико и подинамично искуство по овој предмет. Прирачникот по Драмска уметност, пак, вам, како на наставници, ќе се обиде да ви стане партнер во училницата, како и место на сигурност кон кое секогаш ќе можете да се навраќате, низ непредвидливиот процес на изучување на театарот“, велат од „Театар за сите“.
Прирачникот е бесплатен за наставниците од државните гимназии.
Публикацијата е продуцирана со финансиска поддршка од Европската Унија. Проектот „НОВИ ПУБЛИКИ“, во чии рамки е и оваа публикација, е овозможен од Регионална мрежа за културна разновидност (READ – Regional Network for Cultural Diversity).
Проектот го спроведува Гете-институт Скопје заедно со партнерските организации: Центар за балканска соработка – Лоја (Северна Македонија), Instituti I Librit dhe i Promocionit (Албанија), Kalem Culture Association (Турција), Krokodil (Србија), Qendra Multimedia (Косово).