Живот

Пронајден скелет од човек кој се обидувал да се спаси од ужасот во Помпеја

30. мај 2018 - 9:23 | М.Д.

Функционерите на археолошкиот локалитет Помпеја соопштија ново откритие - скелет на маж погоден од огромен камен, додека се обидувал да побегне од ерупцијата на вулканот Везув во 79 година.

Функционерите од Помпеја објавија и фотографија од скелетот, а на него се наоѓа голем камен блок, кој, како што се верува, го погодил човекот во градите за време на ерупцијата на Везув, во која исчезнаа античките градови Помпеја, Херкуланум и Стабија, а илјадници луѓе починаа.

Скелетот е најден за време на неодамнешните ископувања и се верува дека е во прашање маж стар 35 години, кој настрадал во експлозијата.

Според зборовите на функционерите, тој човек имал тешкотии со одењето, што го отежнало неговото бегство.

Генералниот директор на археолошкиот локалитет, Масимо Осана, изјави дека е во прашање „исклучително откритие“ кое придонесува за создавање на подобри „слики за историјата и цивилизацијата од тој период“.

Помпеја е добро зачувана под вулканскиот пепел и лава, па остана да биде сведоштво за животот и културата на Римјаните од тој период.

Градот Помпеја, јужно од денешниот град Неапол, основан е во шестиот век пред новата ера и во текот на 700 години - до ерупцијата на вулканот Везув, кој го затрупа градот со пепел и го уништи, овде живееја Самнити, Грци, Етурци и Римјани.

Помпеја во 1997 година од страна на Организацијата на Обединетите нации за образование беше ставена на листата на светски културни богатства.

Коментирај