Анкара, 23 октомври 2018 (МИА) – „Делови од телото на убиениот новинар Џамал Кашоги се пронајдени во бунар на територијата на резиденцијата на Конзулатот на Саудиска Арабија во Истанбул“, изјави лидерот на турската партија Ватан, Догу Перинчек.
„Дознав од сигурни извори во безбедносната служба во Истанбул дека телото на Кашоги е пронајдено во бунар што се наоѓа во градината на територијата на резиденцијата на Генералниот конзулат на Саудиска Арабија“, посочи Перинчек за турскиот портал “Хаберлер“.
Саудискиот новинар и дописник на „Вашингтон пост“, Кашоги е убиен во Саудискиот конзулат во Истанбул во тепачка. По повеќедневно демантирање, официјален Ријад призна дека Кашоги е убиен во Конзулатот во непланирана „караница и тепачка“.
Поради тоа се уапсени 18 лица и сменет е висок претставник на саудиската разузнавачка служба.
Кашоги исчезна на 2 октомври, а последен пат е виден како влегува во Генералниот конзулат на Саудиска Арабија во Истанбул.