Археолози во близина на еден брег во Португалија открија остатоци од брод стар 400 години, за кој се верува дека потонал во Лисабон, откако се вратил од Индија полн со зачини, соопштија денеска експертите.
„Од гледиште на културното наследство, ова е откритие на деценијата. Во Португалија е ова најзначајното откритие на сите времиња“, рече денеска директорот на истражувачкиот проект Жорже Фрејре, пренесува „Reuters“, со забелешка дека остатоците од бродот се пронајдени во рамките на 10-годишен археолошки проект.
Во пронајдените остатоци и околу нив, 12 метри под површината на морето, нуркачите открија зачини, девет бронзени топови, кинеска керамика и школки, кои се користени како пари за трговијата со робови во колонијалниот период.
„Остатоците од бродот се откриени на 3 септември кај брегот Кашкаиш, туристичко гратче во близина на Лисабон, а предметите кои се пронајдени се многу добро зачувани“, изјави Фрејре.
Тој и неговиот тим веруваат дека бродот потонал помеѓу 1575 и 1625 година, кога португалската трговија на зачини со Индија го доживувала својот зенит.
„Долго време експерти ја сметаа реката Тагуш за средиште на бродоломи. Ова откритие тоа го потврди“, рече португалскиот министер за култура Луиш Мендеш.
Во 1994 година, во близина на Кашкаиш е пронајден уште еден потонат португалски брод, потсетува „Reuters“.
