Фудбалерите за своите доцнења или пропуштања на тренизните често имаат разно-разни оправдувања, но она на поранешниот играч на Бока Жуниорс е убедливо најинтересно.
Веројатно малкумина во Европа слушнале за Гижермо Марино, играч од средниот ред. Никогаш не заигра на Стариот континент, ниту пак за репрезентацијата на Аргентина. Кариерата ја почна во Њуел'с Олд Бојс, потоа играше за Бока Жуниорс, па мексикански Тигрес, чилеански Универсидад, па повторно дома во Бока Унидос и Атлетико де Рафаела. Во пензија замина во 2015 година.
Периодот минат во Универсидад веројатно беше негов најдобар бидејќи со доаѓањето на стратегот Хорхе Сампаоли тимот освои три последователни титули шампион на Чиле, како и една Копа Судамерикана, додека Марино се естаблира како еден од клучните играчи на популарните У.
Токму во Универсидад имал еден доста необичен инцидент, како што самиот тврдел. Неговиот тогашен соиграч Густаво Лоренсети открива како Марино им се доверил на соиграчите за доцнењето на една тренинг сесија.
„Гижермо рече дека задоцнил на тренингот бидејќи бил грабнат од вонземјани. Тој детално ни објасни што се случило и како се чувствувал за време на настанот. Има играчи кои велат: 'Тргнав, ама стигнав два дена подоцна бидејќи бев киднапиран од вонземјани', но Гиже не е таква личност. Гиже беше многу добро момче, сите го познаваа како таков“, раскажува Лоренсети за Lado B.
„Објаснуваше како одеднаш се загубил и го грабнале вонземјани. Потоа ни кажа како вонземјаните му ја извадиле душата, ја испитувале, но и се грижеле за него додека бил таму. Нешто во тој стил кажа“, вели тој не откривајќи кога точно во двете години под Сампаоли се случила дешавката.
„Искрено, јас верувам во вонземјани. Тој даде одлично објаснување и мораме да му веруваме. Ќе треба него да го прашате за да раскаже поубаво и подетално, но во секој случај тој беше грабнат од вонземјани“.
„Не знам дали Гиже му ја кажал истата приказна на Сампаоли, да бидам искрен. Многу веројатно дека тие разговарале после доцнењето. Но, познавајќи го Гиже, мислам дека Сампаоли му поверувал. Што да се каже? Случката е за на Discovery Channel или слично“, заршува Лоренсети.
Чиле е позната дестинација за НЛО каде често воената авијација има блиски средби на небото. Дали авантурата на Марино е вистинита или не, ќе остане мистерија.
