Бунтовниците во источна Украина, поддржани од Руската Федерација, ги обвинија владините сили на Киев дека во петокот гранатирале село, извести агенцијата Интерфакс, пренесе Reuters.
Киев и бунтовниците меѓусебно се обвинуваат за ескалација на тензиите по артилериските и минофрлачки напади Коишто се случија во четвртокот. Овој потег предизвика страв дека во конфликтот може да се вклучи и Русија.
Кремљ во четвртокот нагласи дека се „длабоко загрижени“ за ескалацијата во Украина и дека внимателно ја следат ситуацијата.
Според извештајот на Интерфакс, самопрогласената Доњецка Народна Република наведува дека селото Петривске, кое се наоѓа во одметничкиот регион, било гранатирано во 5:30 часот по локално време.
Интерфакс пренесе дека руското Министерство за одбрана објавило дека неколку руски механизирани пешадиски единици се вратиле во нивните бази во регионите Дагестан и Чеченија, откако ги завршиле вежбите на Крим.
Кремљ оваа недела соопшти дека почна повлекувањето на војници од областа којашто граничи со Украина, но Киев и Западот го оспорија ова и тврдат дека не гледаат повлекување, туку ротации на војници покрај границата.
