Властите во Брисел решија привремено да ја забранат проституцијата до понатамошна одлука, како дел од обидите да се спречи ширењето на коронавирусот во главниот град на Белгија.
Властите исто така затворија три хотели за сместување сексуални работнички поради непочитување на мерките за социјално дистанцирање, соопшти Вафа Намих, портпаролка на градското собрание во Брисел.
Таа рече дека ќе се засилат полициските контроли за да се осигураат дека забраната за проституција се спроведува без исклучоци.
Одлуката следеше откако Брисел одлучи да воведе полициски час за баровите. Од почетокот на неделава, сите барови и кафулиња мора да бидат затворени од 23 часот вечерта до 6 часот наредниот ден, а локалите за храна и пијалоци ќе затвораат во 22 часот.
Брисел се соочува со раст на дневните бројки на новозаразени со COVID-19, па веднаш почна затегнување на безбедносните мерки за зачувување на јавното здравје во пандемија.
Германските бордели отворија во август, но без сексуални услуги, само со еротски масажи. Од почетокот на септември почнаа да работат борделите во северните покраини, со почитување на строги мерки за безбедност, што секако, им ја отежнува работата.
Борделите во Швајцарија уште во мај смислија план како да се обноват услугите со максимална физичка дистанца, а најголем дел од тој план беа секс позите и строгата хигиена.
Здружението на сексуални работници ProKoRe објави хигиенски водич и предложи секс пози во кои двете лица се „максимално оддалечени“, како doggy-style и cowgirl.